健吾收音機

因健吾之名，所以響散貨場，以每本$15 既價錢買左兩本 4 年前出版既「健吾收音機」。仲有本「健吾收音機3」，但係未去到散貨場地步，所以未買到。

講乜？一個字，「愛」。

入面講既愛，其實好多都係愛既反面。。。

當然，恨之前當然有愛啦。

原來，好多人拍左好幾次拖，經歷過分之後，不禁會問自己好幾個問題：甚麼是愛？到底自己懂不懂愛？到底自己是否愛錯？我很愛他，為何他要離開我？

其實，大家都讀過書，或者讀緊書。但係課桯入面從來無一門專科叫「戀愛」。係大人唔識教呀，定係佢地唔想講呢？還是佢地認為細路仔唔應該咁早學戀愛？係細路仔大大下就會識戀愛、愛人？

大人社會普遍認為，戀愛唔關智識事，戀愛係做左成人...即係過左18歲先開始關佢地事。。。男男、女女、男女所講既愛情，就是這個。但係與家人、親人的愛，又與此無關，親人之情應該係自出娘胎就會識既野。。。

咁分法，係咪最正確呢？老老實實，呢度比唔到答案。

每個人、每個社群都有其自分法，無絕對的答案！

記得預科讀中國語文及文化時候，讀過「人禽之別」。現實睇，有時候，人定禽其實都係一線之差。

咁，到底乜野至係愛嗟？若果一定要我講，我會話，要知道、明白愛，只是第一步。要有愛的成分，係要靠自身在愛中學習。愛，除左愛別人，其實更深層次既係，自愛。

好多人，因為對自己無信心、覺得自己係要比人望、甚或乎無人陪會活不下去，而去尋找一段戀愛。但係找人戀愛時候，往往係帶著自己經歷中既缺陷而去找人。結果找到一個時，當進行二合為一的過程時，發現對家在不同程度上不能與自己合體，而要將之拋棄，再接再厲，搵過個。

但係，就從無諗過，點解呢個以為正確既人，點解會同自己合唔埋呢？諗既話，最多會諗乜呢？

其實，有冇諗過，傷痛其實......係兩個人一齊傷、一齊痛既呢？

當您話對方無為自己著想、無為自己乜、無為自己物既時候，其實對方都會講緊一樣既說話？

吓？原來會咁架？佢都會咁諗！無理由架，我對佢咁好，乜都為佢著想，乜都以佢為先，乜都比佢知，佢做乜我都關心一下......佢都會話我對佢唔夠好！你(即係打呢篇野o個個人，小弟是也)一定係亂講！

老老實實，咱們(包括小弟自己)，有些時候，諗野只係諗自己一份，而忽略左別人。當你認為咁做係對方最好既時候，有冇諗過，對方係咪咁認為呢？有時候自己認為好的東西，對別人卻未必最好。因為，大家都來自不同的背景、不同的世界、不同的文化，所以會出現如斯對立層面。

講到底，要兩個人能夠配合，仲要有雙方共同努力，互相適應對方生活，同時又要讓自己保持有自己的生活。即係點呀？即係，兩個人兩個世界囉。吓，咁點o岩規矩呀？兩個人拍拖，唔係乜都要一齊至得既咩？點解會要保持兩個世界架？

黎到呢度仲要話點解，真係應該返火星。或者搵一條隔夜油炸鬼同你過世至得咯。

始終，係兩個不同既人，即使點合體，都要有些空隙留給對方，唔係，您只會令對家感到窒息，然後離開您。若果您只認為對家要為您改變，而自己無需改變，此種想法......祝您好運。