港鐵

港鐵，香港鐵路有限公司。經營範圍由鐵路網絡、接駁巴士、物業管理、商場、寫字樓、顧問服務......

業務相當多元化。今日想講既，並唔係介紹呢間公司<想了解更多，自己去維基睇啦>、或者係突然唱好，叫看官去買"66"，而係想講下今年再出現一樣事：加價。

記得2002 年後，已經討論兩舊鐵要溶為一體，但因為冬冬既政治手腕唔夠力，拗唔掂佢地，要去到九鐵兵變，至成為成功合併的導火線。都係嗰句，想睇兵變內容，維基啦。

兩鐵合併，起初令人感到開心既係，合併後有車費下調，轉閘費減免呢幾粒糖衣毒藥，當時好多人都覺得呢粒藥好好味，因為係坐車時候比既錢可以平左。但係合併時候，已有一位唔記得左佢係乜水既學者講過，兩年內不加價，有效期只有兩年，之後會連年加價，因為可加可減機制，係建基於運輸業工資指數等升多過跌既東東，因為若果佢地齊齊跌，香港經濟都唔好得幾多咁解，所以一開始行尼個機制，學者已經預告兩年後，無論佢賺幾多錢都好，都會按機制加價，最終受苦既都係乘客、間中會坐港鐵既市民。

記得舊年港鐵出黎講過，按機制，加少個「豆零」都唔得。因為香港係「法治」之區，做事要按法例、機制去做。呢一點，正好道出大部分議員，根本連法治是甚麼就坐左入去議事堂，因為佢地係反對加價最大聲嗰批。當年雷曼係咁，今日亦是。

個人而言，間中會坐港鐵，因為港鐵確係時間快好多。好似早幾日過樂富，若果坐船轉巴士，要兩點三出門坐兩點半既船到觀塘>>>11D開三點零五分。去到樂富係三點八。但按同一時間出門坐港鐵，去到樂富係三點。。。夠時間去三聯買左兩本書。

要加價，當然心中不是味兒，要比貴多一些。但係按機制做，確係有其法理依據，真係加少個「豆零」都唔得。因為，近幾年，香港係咁谷行個自由行消費、炒起個樓市，但普羅市民從未因而得益，最低工資實施，反而令百物飛脹，「沒有最貴，只有更貴」。所以公用事業要加價，一定大把人出黎反對，實在，要多謝貪曾。起初發夢都諗唔到自己做特首，習慣左就洗定手等 2012 收工，乜都留比下一任做，結果搞到咁。。。

港鐵加價，法理上有依據，情理上冇依據。但香港營商環境就係咁，只要有一班固定客人，就可以對佢搾乾搾盡，然後比番幾個豆零佢地做回報。引入競爭，地方太小，難做也，難也，難。

唯有，坐開港鐵既乘客，諗下有冇計仔慳多幾蚊留黎搭車係啦。