巴士路線發展計劃

唔講唔知，原來政府決策局每年都會要求各巴士公司就來年的路線定出發展計劃。一般而言，每年6 月30 日前要交到功課，否則......無講過會點罰。。。罰抄書？罰企？無人知。。個人想法，最多就係催佢地快手交功課。。。

近年，多條鐵路相繼落成，鐵路的覆蓋範圍更廣，選擇鐵路出入的市民確係多左，所以，近年來，巴士公司會配合政府攻策，著手縮小自身網絡，同時增強一些呈飽和狀態的路線增加車輛、開發新路線以尋找新客源。

好似西鐵通車前，元朗、朗屏<<>>紅磡碼頭的 268B 巴士不愁無客。但西鐵通車，加上接通尖沙咀、紅磡後，使用西鐵出入雖然麻煩，但係至少可以避開尖沙咀一帶的恆常擠塞，不少乘客改用西鐵出入，使 268B 客量大跌，所以本年度，九巴計劃將之改為早上特別服務，只開出 4 班車，與原本路線無分別，只是不再全日行駛。

另類重組方案，好似城巴往來屯門南部及港島的 962、962B線，前者因為路線太迂迴、後者路線太冗長，被建議以 962X、962S 路線班次取代之。962X，與962 差不多，都是由龍門居開出，分別是 962 要經大欖才上高速路，962X 則取道市中心往高速路。962B、962S總站都在置樂花園，962S是晨早特別班次，不經三聖至深井的青山公路，962B 則途經。所以城巴建議，主線962、962B 改為早上提供服務，期餘時間以 962X、962S 取代。以更善用資源，及提供更佳服務予兩區乘客。

其實，巴士公司亦有許多增加車輛的建議，因為不少客量龐大的路線，如九巴1A、隊巴線101、111，都有建議加派車輛行走。1A，除非好得閒，否則由尖沙咀往觀塘，千祈唔好坐佢！旺角隨時塞你一粒半粒鐘都得。亦正因為此，1A 有時會爆棚，有時會小貓三幾隻在車上。。。多人搭既路線，確有需要增加車輛。而需求不大的路線，巴士公司會建議削減車輛，或改用單層車輛行駛。。。

巴士路線發展計劃，一般市民未必太關心，反而是巴士迷或地區人士比較關注，利益比較重。其實市民都可以在區議會網頁中找尋各區議會的會議記錄下載來參閱路線發展。