娛樂CIA

「全民娛樂，電視一睇化」。。。「我都唔係淨係講財經嗟」。

兩句最令我記得既口號，來自好多人睇到，但係唔肯轉過去睇既亞視娛樂節目：娛樂CIA。

全民娛樂，本應係為咁多個電視台(收費及/或免費)應該為觀眾提供既野，只係市民習慣左睇某一個電視台，令其自我澎漲，目中無人。另一個台又唔爭氣，執到寶又唔識寶，讓寶白白流過去人地度。。。

或者有人會問我爛台唔好睇咩？好老實講，爛台既節目真係唔好睇，例如劇集內容套套都一樣，只係角色人物不同。例如「所謂chok王」可以一連幾套連續劇都出，乜爛台真係無人咩？養住好幾百人唔使錢架？

咁，娛樂CIA 係咪真係唔好睇，唔值得班「呀婆呀伯呀叔呀嬸」轉過去睇呢？答案係「否」。你可以話亞視既野無樣好睇，但係呢個節目，就令到 CCTVB 抄左另一個八婆節目！話亞視唔好睇，人地就唔使抄啦。雖然個八婆節目比人鬧左一大輪，但班「呀婆呀伯呀叔呀嬸」咪又係邊鬧邊睇。。。或者會有人話「一個邏輯」，就係唔睇又點知佢係衰。。。

啟播之初，大家都好清楚「娛樂CIA」既宗旨，就係要讓娛樂、電視一睇化，兩者共融。我個人都相當喜歡睇「娛樂CIA」，除左內容有新意、制作有誠意，主持有創意，最重要就係「娛樂CIA」同其他娛樂節目不同，「娛樂CIA」將電視電台既環節，全部搬左上大銀幕，讓觀眾有耳目一新既感覺。

綜觀近期，新的監制入場後，似乎用回舊有思維，同爛台既聲東擊西做法無異，呢樣野相信會係「娛樂CIA」踏上滅亡之路之始。雖然話「娛樂CIA」都係左抄抄、右抄抄，但勝在原先監制夠膽色，搵左一班同電視娛樂節目拉不上太大關係既人黎做主持。例如講開足球、講開鬼故、講開財經......但係佢地誠意可加，亦相當努力去做好個節目。

今個星期的革新，本來係好既，但係形式上，加入左一些疑似青春氣息既「少女」入局，個人而言不敢苟同，亦對佢地露得幾多得幾多不太認同。若果繼續落去，成個節目既焦點及重心將會失去，到時候，只能講一句：不看也罷。

回向

通街都會有不同類型的佛家內容，多我一個唔嫌多既。。。

有一篇回向偈咁樣講既：
「願以此功德，莊嚴佛淨土。上報四重恩，下濟三塗苦。
　若有見聞者，悉伋菩提心。盡此一報身，同生極樂園。」

平日如何可以多做功德？除左去放生，其實好多細微細眼既野都可以為自己儲備大量資糧。
例如幫人頂住門，方便有需要人士出入。唔好介意幫人而沒有獲得一句「謝謝」而不幫別人，因為幫人，係為自己儲資糧。所謂境隨心轉，無必要由別人操控自己的情緒，助人為快樂之本。

要記住，我們一言一行，唔好以為無人知，下面其實係全部記低左。功過分開計算。。。唔好以為無人聽到就等於無人知，因為地上無人知，天上有人知。。。

香港電車

香港電車，自上世紀 1904 年投入服務開始，至今已經超過 108 年，由最初26部單層車廂，演變至無頂上層；及後因雨天無法載客而逐步由帆布車頂至全密封車廂，經多年演變至今天的樣子。去年開始，更決定逐步將木製車身更換為鋁合金車身；及將驅動摩打更新，提升車速。

無啦啦寫電車，係咪有乜野事幹？非也非也。只係見電車迷、乘客對全面更新車隊各自表述，小弟都講埋一份，哈哈。

有些人認為新不如舊，認為舊車比較有特色，較有手工。有些人認為有更新才有進步。

我屬於後者，有更新才有進步。記得當年電車公司決定要為使用多年的控制器進行更新，背後原因曾經有控制器及車頂電阻廂於開行時發生火警，引致駕駛該車的司機跳車逃生，更被對行電車撞瓜。之後電車決定更新該套據聞重達 300磅 的鼓式控制器，順道將車廂由木紋顏色變更為清爽白色。及後在2000年推出千禧電車，以鋁合金做車身結構，主要可以減輕維修成本，始終用木車身最多用到 15年左右，鋁合金最多可以用到 40年。期後為提升車速，引入斬波器，令摩打無須再由「一度」逐度跳至最高「八度」。

始終電車行駛超過 100年，翻新是時候。原先母公司都想套現離場，所以 2009年決定分兩批將手頭持有 100% 電車公司股權全部出售予法國威立雅公司。。。

新公司入主後，確立全面使用鋁合金車身，但會保留數輛有特色的舊款電車，對於認為「新不如舊」的朋友來說，應該是不幸中的大幸。

或者有人會問我，點解舊不如新呢？個人認為，以商業角度考慮，木制車身比較重，而且維修成本不輕，以現在客量計算，長遠其實有需要採用更耐用、堅固的車身。而電車只能跟住路軌行，較受路面其他交通工具影響，例如巴士排隊入站，佔用一小部分電車軌，都會令電車不能向前行。採用速度更高牽引系統、更輕盈的車身，對追回班次起著一定作用。

如果以維修角度考慮，金屬車身對維修成本、外觀相對木制車身均有好處。鋁合金車身裝拆均較容易，方便維修。車身外面不需鏍絲，令車身更為美觀，上廣告時更見平滑。

百年電車，90年代末備受競爭，服務水平低降，至今天有心人銳意改善服務水平，以可以與地車、其他巴士服務競爭。用更快的、更先進的、更高素質的牽引系統、行車控制、電路設備。作為全球唯一以全雙層車隊運作的香港電車，更新，使其進步；不變，原地踏步；復古，向後退步。做人始終係向前望，而非向後望。

香港近況

近期，無太特別留意香港發生緊乜事，記憶中十月一日國慶日煙花匯演在南丫島發生左一宗數十人死既撞船事故，令人婉惜。願在生者可以克服傷痛，走出困境。離世者家人可以超越死亡，走出傷痛，回復正常生活。

話說，樓市正步向更進一步既瘋癲，多個陳舊屋苑都創出天價呎價成交。。。甚麼幾萬蚊一呎，幾多十萬。。。

諗深一層，其實都係「經紀要開飯」累事，皆因自貪政府推出炒樓花稅後，樓市確係靜左唔少，一眾經紀們為左要令呀婆呀嬸都將佢地既棺材本、買飯錢都拎去買層樓，等佢有飯開，出盡法寶。日日話樓市有排升，唔買走寶；甚麼同區罕有，講到個個盤都有海景睇咁。

個個等開飯，皆因市場有大量經紀，跌個 M字 招牌隨時都壓死十個八個，點會唔等飯開呢？

母親節

母親節，大家都重視。每到節日，子女會通通出動，去茶樓排餐死等張枱，同媽媽飲杯茶。。。

出家人不在塵世，會否慶祝母親節呢？
其實出家人都有慶祝母親節，只是不在五月的第二個星期日進行。
在出家人而言，不會用「慶祝」二字，母親節是為紀念母親生下自己的痛苦，所以佛家會稱母親節為「母難日」，以唸親恩。
佛家認為，子女是父母的鏡子，子女對父母不孝，背後其實是父母對子女不子所積落的，並非無中生有的單純不孝，作為父母其實要負一份責任，不應單單完全指責子女不孝。

每個父親母親都想自己子女孝順，到底怎樣才可以使子女對自山孝順，而非「頂心杉」？

首先，父母要以身作則，要子女學懂放下身段，自己首先放下身段，學習認錯，在子女面前勇於道歉。傳統父權社會，父母的權威是至尊無上，不容侵犯的。所以，錯，就只會在子女身上發生，而不會在父母身上發生。卒之，父母如何犯錯，都不用表示歉意，因為父母是不會犯錯的。

因為這些歪論，當今父母常埋怨父母難做，甚麼都做不到。但是，為何有些家長能夠做得好而自己做得不好呢？有否想過，是不是自己不願意跟隨社會步伐向前走，只想別人遷就自己，不向前走而已？

當然，孩子真的完全不能控制，確實需要尋求協助。反觀自己，當孩子年紀尚小時，自己做了甚麼，令孩子今天不受控？冰封三尺非一日之寒，今天種下的因，三年、五年後的結果。

要與子女好好相處，就由當下開始，以自己希望子女變成如何來相處吧。