那些年 2

講下套電影，對上一次入戲院，已經係兩年前，好在戲院唔係等小弟開飯，如果唔應該一早執哂架咯。本身甚少入戲院，所以對台灣片唔熟，所以講唔到呢套片同其他台灣片有咩分別。只可以講既係，呢套片勾起相對多人既回憶，尤其是係讀完書無耐既朋友，即係小弟無份囉，離學校都有近十年光景。。。咁樣都比到人串，死未！

套片，戲軌得一條，分支則較多。集中討論一個沈佳宜，響佢周遭有不知幾多個呀茂呀壽想追佢，但係佳宜偏偏睇上左柯景騰。由起初要佢溫書，到後來分開讀書，一直都有相互記掛著。咁幾時係轉折點呢??? 當柯景騰無啦啦走去搞場打鬥賽既時候，宜走到去睇......跟住兩條友為呢件事吵左一輪，跟住兩個就咁分開左。就好似...你估我無鐘意過你咩? 一樣，怪不得喊到好似傷風咁。問世間情是何物，只要有共鳴既話，喊到夠香港人飲兩個月都夠既淚水，原來係唔難儲到既。

不過睇到最後既半邊月時，反而令小弟諗起一首詞......天若有情天亦老，月如無憾月常圓。好在朋友無上黎睇既嗟，唔係又會比佢打架喇，以佢咁暴力。。。

最後，佳宜係同另一個男人結婚，而班中學同學就齊齊去到賀，新郎哥話要咀佳宜，先要咀佢自己......最先去咀既，係景騰......當然，的而且確係佢既那些年。。。所以特別有感覺。

那些年，存在於每一個人既心中，無論你幾多歲都好，你都會有你既那些年，唔使怕，去搵下自己既那些年啦！！！！

那些年

同朋友去左睇那些年，朋友喊左出黎，期後聽番，原來係有段古......小弟響呢度就唔講人地既事喇，費事睇到就唔好啦。

其實，每個人心目中都會有佢自己既 那些年 既事，只係您地對呢個那些年既感覺月幾強而已。朋友既那些年，小弟就未經歷過，或者同小弟當年比較怕醜、唔敢講野有關係。但係，看官可能會問，咁你幾時有所轉變既呢???

其實，小弟都有過那些年既。記得中一曾經試過 puppy love 架，只係當年只係對人地有興趣，可以講連拍拖係點都唔知，當年小弟都係一個傻瓜咁樣。傻呼呼咁樣。去到暑假之後，大家去左唔同既班讀咁就各散東西，就無左咯。

中學期間，都試過幾次暗戀人地，不過唔係自己唔敢講，就係對家無意既情況下結束......

特別提款權

特別提款權（Special Drawing Rights）是由國際貨幣基金組織（IMF）及其成員國在1969年創立的特殊形式「貨幣」。各成員國向IMF承擔的財政配額，當中有25%以SDR支付，其餘以該國貨幣支付。成員國向IMF承擔的財政配額愈大，在IMF擁有的投票權亦愈大。

SDR的價值，是根據一籃子主要交易貨幣（美元、英鎊、歐元和日圓）來計算，其中美元佔41.9%、歐元佔37.4%、英鎊佔11.3%、日圓佔9.4%，並隨這些貨幣匯率的波動而變化，現時每1SDR可兌換12.25港元。SDR可以作為IMF、國家之間及國際組織的記帳單位。它不是一種可流通的貨幣，也不能向IMF直接要求兌換，但特別提款權的持有者，可用它跟其他IMF會員國交換上述的主要交易貨幣。利用SDR記帳，好處是避免因個別國家幣值波動，而蒙受過度的匯率風險。

現今教育制度一些思考

話說小弟最近重操故業，返去學校睇塞豆窿。比起早幾年，質素的而且確係差左好多。例如三年班對乘數表係完全唔掌握、解題都似乎有問題......加定減？中文點樣重組句子呀？查字典點查呀？好多好多問題。

到底係學生既問題呀，定係教育制度既問題呀，抑或係我地班導師有問題呢？或者試下由唔同角度去睇。

由家長角度睇，現今好多家長都只係制作一舊塞豆窿出黎，好多心機、心血都百分百放左落去，變成直昇機家長，乜都要幫佢地做決定，條菜剪碎佢，因為佢牙仔唔夠力咬<<<<對住個二年級都係咁做。其實乜都要幫個塞豆窿做決定，變相剝奪佢地自行思考既權利，呢樣野對佢地未來既發展有著深遠而負面既影響，因為佢地唔會再識思考。第時乜都係等人諗，點樣做未來領袖呀......

從制度黎睇，近呢十幾年變得太多，變，一有好有唔好。好既就係唔再單用填鴨式教學，開始培養學生自行思考。唔好既係學生往往要做白老鼠，但係有幾多個制度係可以一出黎就可以完美既呢？只不過係，或者會有學生問點解要我做白老鼠，點解唔係佢地？邊個都有機會做，自問曾經讀過通識教育，其實唔係件壞事，因為係訓練平日要對週遭事物要有更深理解，有何不妥呢？

從學生角度睇，佢地無左以前好學向上既心，自己唔需要再動腦筋就會有人幫佢地諗好答案出黎，自自然然就唔會再奮鬥，為自己未來打拼。繼續就乜都攤大手板，等人救。早排有班二百蚊兵團走左落大笨象樓下架步訓覺，話要反對資本主義，走回共產主義道路，到尾其實係想唔使做都有得食。但係，現實話比大家聽，共產主義有好多流弊，如果唔係我地祖國都唔使搞什麼改革開放啦。如果共產主義真係咁掂，蘇維埃就唔會分裂啦。

呢度唔係批評共產主義唔好，只係指出，財富不勻唔係好簡單咁改左唔行資本就等於人人均富，因為可以有人人均貧架！如果佢地係夠膽既，飛去美國 Lin 死奧巴馬同埋伯南克呀笨！行資本主義係咪就係造成社會不公既原因呢？相信唔係得一個答案既。至於有幾多答案，就留待看官自己發揮一下喇。

近況更新

對上一次講近況都好一陣子咯。

確實呢排都有唔少經歷，有可以笑足成日既，有唔開心一日都有。不如就講下開心架啦，組織一下先......

開心，唔係終於有拖拍，亦都唔係中六合彩，而係我仲響度，未死得。

點解咁講呢？我知道好多人會唔開心，但係，有乜野係比平安來得更珍貴呢？話說，我一個老死，據說家中有成員生病，好在係初期仲有得醫。希望佢屋企人同佢自己都可以安然渡過呢個關口。

另一方面，最近小弟做左一次搞手，幫個普通朋友搞左個生日會，內容好簡單，就係去K 房唱K。當中唱左唔少歌，尤其以何CC 就最多，驟眼睇以為去左何CC 頁面，其實係睇緊已選歌曲清單......真係咪話唔吹脹！不過最令我意外既係，我揀左幾首冷門既舊歌，隻野居然可以一齊唱到，咁先奇嘛，仲諗住係我呢個老餅至聽，你都識唱，仲要係半路插入都得喎......不過首歌係好聽既：林憶蓮既愛的世界，唔知有幾多看官識唱呢？仲有一首，隻野誇張到話佢識唱o個陣我仲著緊開朗褲云云(據聞我老過你架啵)：王秀琳既有種愛，呢首又係我的一首至愛，不過相對冷門，無謂對牛彈琴，所以好少會唱。

不過最好玩既就係，CHUNG CORDERO一跳舞，就會有人從後面施襲，一腳踢去個八月十五度，就連扮乜都扮知咁，懶係對我瞭若指掌咁，衰鬼xd......無乜肉仲咁踢，真係無陰功！不過算，係隻壽星公就由佢啦。過左一個月都係咁就無面比架喇！響呢度，要特別多謝壽星公既朋友，多得佢，今次先免到人頭費乙名，大家唔使夾多一份，無言感激。

唱K 入面，唱左好多經典歌曲，例如有教我如何不愛他、千個太陽、Seasons of love<<<佢都唱到，真係深藏不露，十八級鋼琴真係零舍不同。唱到夢裡共醉，因為朋友唔知係我點而跳左，有人補充話......「佢比我cut慣架喇」。。。又關你事囉，懶係講到關係菲比尋常咁樣。

最後唱到兩點左右離開，因為朋友們眼訓咯。

多謝車資津貼，比少十幾蚊，哈哈。上左N619，唉，都話去九龍灣坐N121架啦，結果就坐到灣仔至願落車！過去駱克道街市站等車，見到有個醉酒鬼......好在係去坐的士，但係腳步浮浮，睇佢坐唔得幾耐就會嘔到一車都係，第一個的士叔叔醒呀，條友唔太靠埋架車就急急腳走人。到第二架就......上左車，無得趕落車，唯有頂硬上。

最後返到屋企係......三點九，沖埋涼四點半訓，第朝咪又係八點起左身...... ...... ......

隨喜功德

早前講過，人總會有個妒忌心。衍陽法師自己都話，其實自己都會有妒忌心，有時見到人地個講堂咁大，但自己既細咁多……言猶在耳，法師即刻話，自從學習左用另一角度思考，佢發現，其實自己唔係一定要只係妒忌人地。。。

無常，好多人認為係一種遙不可及的事，但係無常其實每一天都會響我們擦身而過，只係我地唔多覺佢埋左你身。結果無常有一天帶走左你身邊一樣野既時候，或者你會怨點解要帶走佢……但係，如果你一早就學懂左無常呢個道理，你會發現，生老病死其實係人生必須經歷既野，而且仲係萬物既自然定律之後，你又會覺點解要咁快呀……點解你唔可以用隨喜功德既心去諗呢？

因……口入面有個大字，大字再拆出一、人。每個人既結果其實有著一大原因。眾生畏果，䔒薩畏因。

天水圍的日與夜

早排許鞍華o既姚姐憑葉德嫻拎左個康城最佳女主角既獎，香港舉港歡騰咁既樣，又話香港電影業仲有得救云云。

今舖唔係同大家講什麼香港電影業前景，亦唔係講下青姐既前景。反而想講下天水圍的日與夜既情節。記得鮑姐鮑起靜講過，呢個呀媽既心情係，佢從來都唔覺自己欠缺左乜野。話說佢老公早死，留左個仔張家安比佢，而兩丁友就住響天水圍公屋入面。

天水圍的日與夜，係當全城港人都講緊天水圍點慘法既時候，一班有心人去用另一角度，帶觀眾入去天水圍睇下佢地生活，係咪真係咁慘。以我個人不定期走進天水圍的觀察，天水圍其實無某些人講到咁悲情城市既。至少天水圍都唔係個個拎綜援，有好多天水圍人其實好勤力工作，為著就係唔使政府幫，希望可以自力更生。而故事中既主角亦都係咁，佢從來都唔覺別人、社會欠左佢乜野。

記得鮑起靜曾經講過，呢位媽媽(貴姐)從來都無覺得佢欠缺左乜野，每日都係返工放工，煮飯、做家務，日日如是。其他人睇落，佢好悶，無自己既生活，只係為家庭而活。而佢個人既性格亦如此，當年供兩個細佬讀書，兩個細佬都發大達，而貴姐就繼續簡簡單單咁過著兩母子既生活。貴姐既兒子—張家安。典型乖仔，成續唔係標青，而且屋企唔多錢而好少參加課外活動。

貴姐唔單止佢自己快樂，而且仲令到一個新搬入既鄰居，由隱敝變為開朗。貴姐自己響附近一間超市工作，每日就係去開榴槤。梁歡(陳麗雲)最初搬入天水圍都好唔習慣，後來佢又入左呢間超市做賣菜。剛巧遇上貴姐呢個貴人，歡姐想幫自己買把風扇，貴姐即刻打比家安，啦佢落樓幫歡姐拎返屋企。試過買完餸，同歡姐一齊合單抽獎，送左份獎品予歡姐。歡姐最後比貴姐感動到，可見平凡人都可以做到好多不平凡事，唔一定要名人至會做善事，唔一定要掛個牌至識做好事。就好似拎牌既估評人唔一定比唔拎牌既人好，唔一定會識講真心話，唔一定識拆冧把降。

有時諗，其實現代人類會唔會太多搞作，令到自己連休息時間都無，個個都只係顧住自己，好多時會忽略左其他人。結果往往要等失去左至發現自己做咁多野原來都只係得個殼，內在其實十分空虛，完全唔知自己活著為何？

好似失去左青春，至發現原來自己只係掛住做，而唔記得左青春係乜東東，結果皮膚又老又黃既時候至去補乜補物……

好多時候，人類只係識諗自己，認為自己搵到好多錢返屋企就係對呢個家盡左責任，驀然回首，到底自己對呢頭家既了解又有幾深呢？

宗教信仰

　　好多人都會有宗教信仰，但亦有些人認為宗教係一種虛無既野，不值得一信。不過小弟就咁睇，宗教背後，您信就會有，您唔信就點都唔會有。咁，到底我有冇宗教信仰既呢？當然有……就係佛教。

　　到底，CHUNG CORDERO 幾時同佛教結緣既呢？咁就要數返大約十年前，有一次既星期日，呀媽開著部收音機，轉左去官府電台第五台，剛好當時就係播緊葉文意居士既佛學講座，就係咁就同佛陀結下不解緣。

　　記得，當時係講緊「執著」，自己當年仲係一個黃毛小子，對好多野其實都抱著一個放不下，例如當年有人改我家姐個名，我就好認真咁要同人地講明佢個名係咁樣……家陣諗返起其實都幾傻。別人點講，其實係別人張咀巴唔收，自己可必要為人地而起個嬲怒心呢？何必為自己帶來一個苦呢？

　　後來，自己開始對事情學習用多幾個角度去思考，開始明白到，世事唔係只有一面，只要識用另一角度去諗，就會發現到事情仲可以有彎轉。

　　佛教，都經常提到感恩。有些人話感恩係基督／天主教至成日用。其實，感恩心，唔係掛在口邊就得。最終既目的，其實係想您將呢份心活在你既生活中，咁至係真正既感恩心。單單掛在口邊，成日話感謝主，實際意義其實不大，因為要感恩，就要從心出發，發自內心咁去感謝蒼生，呢個至係感恩。

　　咁，係咪天主教佢地既感恩就係假呢？當然唔係。只係有些人利用宗教去傳播一些非正式既道理，天主教既感恩，都係教導人由內心而發，只係那些有心人自己未掌握箇中真正意義，就以為自己係天神派落黎，響度胡說八道。講到底，宗教其實都係導人向善既宗教，如果有宗教話比錢就可以令自己免去罪名，呢類其實係邪教。

　　有好多人都會以為，上香就係佛教、求簽就係佛教、拜神就係佛教。其實，大家都錯左，佛教其實係唔上香既，亦唔需要放個佛像響度先至係信佛教、做左佛教徒。其實，佛，係活在生活中，無需大費週章整個佛像出黎貢養至叫做信左佛。正如觀音借庫，其實觀音係無借庫、開庫呢回事，只係民間既人話佢係咁既嗟。

　　不過，宗教信仰，每個人都會有佢地既觀點既。正如基督教同天主教都有分別啦，係咪？