胡孟青 下

講開胡孟青，到底點樣知道呢個人呢??

話說，五六年前，一次有線既人上門推銷，咁就安裝左有線。

有一次，呀爸同我講，有個咁既股評人「個股民買左隻股票跌左，問點算好?? 個股評人講完一輪，居然叫佢問朋友拎番先」......咁都得。

就係咁，開始認識胡孟青呢個人。笑鬼死。跟住開始留意佢做節目，朝早...可以用收音機，當年係同呂小姐一齊做。到下午時間，因為事忙，所以要錄起佢，返屋企至有得睇，順便睇下會唔會又有笑料可以留低佢>>家下都有近三隻碟係睇呢類野。

聽落，青青真係有做準備功夫至開咪，唔會求其老吹老作，亂咁叫人買。有時佢睇唔好既公司，佢真係會反問你：唔買得唔得呢?? 不過有時班散仔，唔比佢買又點得呢......比散仔鬧>>唔比買股票，死罪一條<<即使係輸到爬街都好。

由問朋友拎番先，到跌得好慘，去到士可殺不可辱，吸收左不少知識。呢樣野係比起日嘈夜嘈既人學得更多，亦係相當珍貴既經驗。

認識胡孟青，令我明白到做事之，前如果係唔識既，就先去做功課，睇下呢樣係乜叉叉，唔好亂咁黎，話去就去。有時唔係樣樣野都可以話去做就去做。要自己有個認識。

同埋，出事後，請問問自己，點解會咁既呢?? 自己犯左乜野錯......而唔係好似二百蚊兵團咁，日嘈夜嘈，乜都話要真相。有咁多真相比您咩。世上總要有人唔開心架啵，講事實你又唔鐘意，人地有六千蚊你無又嘈、人地起條橋你又嘈、人地有錢拎你無又嘈。

有時候，無左就係無左，無得怪人。點解你唔怪自己貪人地咁高息而中左個頭入去，而係話點解你會賣D 咁既野黎。希臘債息好高呀，又唔見你去買??

胡孟青既著作，亦係我離開學校之後，第一個人令我再買黎睇既書。佢本估市不如練功，入面講野，並非o個D 一字排開既星級分析員...買呢隻、買o個隻。聽到一些估評人係咁話呢隻買得、呢隻買得......心都寒一寒，跟住聽到佢都揸左當中近八成公司股票，當下諗會唔會呢個股評人可能都坐緊艇，話唔埋叫人買，等佢可以比手貨新股蟹呀婆。

著作入面，主要係教大家點樣做功課，平時有乜野數據要睇，有乜野指數要知，甚或乎有咩網站可以去睇其他股民既心態。最緊要係，留意大行既冧把降，唔好以為佢地真係咁好死，比個冧把你去跟買。所謂「公就大行贏，字散仔都要輸」。大行報告、窩輪推介，好多時都應只係用黎做參考，而唔係大行唱好就走去買架。通常大行叫人買，佢地梗係收齊貨至搵人寫份唱好報告啦，唔係邊個幫佢接呀?? 到佢想要你手貨，咪寫衰間公司，話佢乜話佢物，等你放番手貨去佢既口袋度。

即使最近仲有好多人打電話去電台問，呢隻買唔買得、o個隻好唔好買......D錢咬得你好痕咩? 無貨響手真係訓唔到咩??