希臘

希臘既問題，響今時今日已經係一種類似癌細胞咁，不停咁復發，不停咁抑制住……但係點樣都襟唔住架喇，總有一天要爆煲。家下歐盟點都要泵水頂住，唔比爆住，其實何必呢？

其實，當年歐盟為左比多D成員加入歐盟做自己友，暗中做左好多事，至比到五隻豬仔入到會。但係，佢地當中明知班豬仔其實內有暗病都照比佢地入，講到底都係想短期內可以增強自己既勢力嗟。

最近，評級機構係咁調低國家主權評級，又為乜呢？今日新聞出左一宗……話有間比利時同法國合資既銀行被指持有大量希債，可能需要歐盟急需救助……而且歐盟仲話可以比個別銀行解體、合併、削債，好在匯豐響2007年就敲定火警鐘，叫定大家走火警，結果一直到現在，呢度又走火警、O個度又走火警，搞到周身都發病，但係又度度都醫唔好。唉……

與其話什麼歐盟要一體，唔可以分開，你睇下呀，德國既民眾對佢地個總理既表態就知，佢地執政黨響德國地方選票中節節敗退就知。德國民眾身受其害，當年打完一戰，德國為左還錢而大量印銀紙，結果呢…咪出現惡性通脹、民不聊生、卒之，咪整左個希特拉出黎。仲整埋第二次世界大戰出黎……問你怕未？

當然，小弟唔係話遲下會黎多次世界大戰，只不過如果歐美一路都係咁笠笠亂，講唔埋唔知幾時會有一個救世主走出黎，誓要入刀山，做救世主呢？自九一一之後，地球開始轉為笠笠亂，呢度咁多戰亂，有唔少都係由歐美背後搞出黎既。所謂反恐戰，背後其實係一個同軍火商既官商鈎結既其中例証。想當年，係邊個捧小B上場架？咪就係班商家囉，所以佢咪要明知會發生九一一都照比佢發生，為乜嗟。當初世界尚算和平，班軍火商邊有工開呀…所以咪要搞單咁既野出黎，等小B可以報答資金來源。

希臘、德國、法國……歐豬仔既債務始終對世界係造成一個不穩定既影響力，而且呢種影響會好似感冒咁，得閒發作下，仲要週圍去，去下希臘、去下葡萄牙、去下西班牙……總而言之就週圍走，週圍搞搞震。。。

咁，次按係點黎既呢？原來當年呀倫減左好多次息，整到呀茂呀壽都走去買樓，甚至乎周身債既都可以買多幾層樓去住。。。結果，美國後尾開始加息，呢班無錢仔就開始現形，斷供潮一觸即發，跟住，原來班接按揭既又將呢類有問題既資產轉讓轉讓再轉讓，整左班二百蚊兵團出黎，日日響銀行門口嘈嘈閉，影響人地做生意。