沽空

最近大市係咁跌，好多人怪大戶沽空，搞到個市跌極都跌唔完。其實，沽空係咪真係咁洪水猛獸，真係搞到市場無日安寧呢？

沽空其實係市場操作之一，讓部分投資者可以就自己買左既貨做對沖。問題係，有部分投資者本身無持貨但走左去做無貨沽空，呢樣野做成左市場上一種不穩。咁係咪就應該將沽空禁左佢呢？其實無左沽空，根本止唔到個跌勢，只係令個市跌慢左，但無令個市掉頭回升啵。早幾年大家都睇到歐美曾經禁止沽空幾個月，但係個市無因為無得沽空而上升番，大家係有眼睇既。所以唔比人沽空，其實意義不大。反之而言，係應該為沽空機制作一些監管，例如嚴格執行禁止無貨沽空。

咁，點解散仔會對大戶係咁沽空咁怨恨呢？青姐既睇法係：「佢地欠缺大戶既本能同實力，所以永遠就處於下風。」咁又係，班散仔只係靠聽大行報告去做野。大行報告本身其實好多時都係慢幾拍，叫你地買乜賣乜，其實係佢地儲夠貨就唱好比手貨你，佢想要貨就唱淡隻股票，等你比手貨佢地。總之一句講哂，「公就佢贏，字你都要輸」。

曾經有投行職員響自己既 Twitter 度爆響口話，班友唔輸我地點賺錢？？其實反映左投行職員同散仔既最大分歧，就係您地賺錢佢地蝕錢，咁樣既話佢地係會比人炒架。經紀要開飯，無計。總之市況波動，大家睇路啦，唔係就永遠都會有二百蚊兵團出動架喇。

唔好亂咁去買貨，最穩陣就玩快閃，唔好響呢個時候同人玩細水長流……唔係當隻股跌到一仆一碌，打電話去問點做，人地都唔知點幫你咯。做投資、同人戀愛都一樣，就係要識止蝕。好多人以為，輸緊錢唔緊要，一定會上徥返家鄉位……你估家鄉雞咩，食落無咁嬲。輸左就要識認，最緊要係，跌低左識爬起身。咁係咪要原地爬起身呢？當然唔一定啦。好多人就係話邊度跌低就要響邊度爬起身，報番之前既仇。講真，唔係度度都有位比你爬番起身架，衰左，其實可以去另一度起番身既。戀愛亦然，你明知呢個係衰人，你仲諗住佢會變好？會唔會太一相情願呢……