最低工資，最高工時

過去數年，坊間一直都有談論著最低工資、最高工時的問題。卒之講左好幾年，實行左最低工資。今年五月一日更將最低工資調升至 $30 大洋。

成功推行最低工資後，近年就講最高工時。講起呢兩樣野，過去有好多人有談及，我都唔講佢既好壞，好壞其實應該係由用家自己去評價。反而有樣野想講下，就係到底搞最低工資既人，係咪真心幫班打工仔既呢？

記得孫柏文曾經講過，外地搞最低工資，原意係為保障一眾男人，好讓女人乖乖返屋企湊仔做家務，等男人出去搏殺。香港呢？呢個最低工資保障既，又係乜野人呢？

香港最需要最低工資既人，包括有保安行業、飲食行業。點解？因為呢兩個行業部分既打工仔，做到隻野咁先得幾千蚊人工，想病都無時間。

之但係，有部分行業既人工，確係反映緊市場價值。供過於求，當年係飲食業寫照。大把人等住入行，僱主點會有誘因出高薪請人！今時今日？有左最低工資，呀豬呀狗都走左去做保安。。。點解？個個貪保安唔使咁辛苦，至少有開工、有收工，唔使好似飲食業咁，隨時唔知幾點收工。況且，保安行業又唔使全日屈住身洗碗、唔使企足全程，所以，以前大把人等住去做洗碗，家下變成出到 40蚊一粒鐘都無人理。你去睇下樂樂、活活，由朝到晚到話要高薪請人，但都唔太多人蘇，就大概明白，最低工資既威力有幾咁大。

到底，係咪要一刀切，全人類都有最低工資既保障呢？？？民粹主義既朋友就會有衝動想查我家宅，衝入黎我屋捉住我條頸。。。好老實講，一刀切，意義不大。開始實施最低工資，僱主們就用削減工時降低成本。樂樂計過條數，每晚九點後只留一名收銀員管維他命M，好等其中一個收銀員工時可以減少。坦白講句，自金融海嘯後，企業業績曾經低落，於是乎延長營業時間，希望可以「賺得一蚊得一蚊」。

到後來實施最低工資，企業要再面對新增成本。加上其他各方成本齊齊上升，企業、公司面對的壓力更大。企業即使不是上市公司，亦要為其發展、盈利目標、員工上下大細、公司高中低層負責，交功課，斷不能像那班口口聲聲要幫打工仔爭取乜、爭取物既議員，只空喊口號。作為企業經營者，就有責任為公司長遠發展定目標，好讓企業可以持續經營下去，才是對員工、股東們負責。

社會責任，當企業幹出一定續後，當然要回饋社會。所謂「取諸社會，用於社會」，但若以民粹主義，強行要求企業不可賺取盈利，這又是甚麼道理？且看看十年前曾興起的「社會企業經營模式」的社企，到今天還有多少間生存下去？只蝕不賺，誰能負擔得來！除了亞洲電視，經營者蝕完五六年後進行止蝕，將蝕本之門交由另一人繼續......

最低工資、最高工時，對某些工資水平與工作時間嚴重不對稱的行業而言絕非壞事，但若果強行將此等措施在全部行業推行，則產生漣漪效應，結果令全民受罪，全行業均欠缺人才......何苦呢！