風季開始

涼風輕輕吹過俏然進了我衣襟......

昨日，香港天文台發出了本年首個熱帶氣旋警告信號。今舖個風叫乜名呢？佢叫做泰利，國際給予的編號是 1205。

點解無啦啦要特地講打風呢，年年都有風打，有乜咁值得要提呀？

事緣，先頭上 facelook 既時候，見到有朋友話天文台耍賴皮，厄人話今朝改發三號強風信號，最近就講到晚間至會出。。。唔係要為天文台幫口，而係天文台都只係根據事實黎做判斷。原先預測泰利會向前行，點知個風唔肯交戲唔鬼行，咁天文台唔通為面子而死榻樓都照出三號波咩？

而且，大家都只係，睇到出三號波，就好似成班股蟹呀婆咁圍住電視機係咁叫，8號、8號、8號、8號......情況同跑馬既馬迷一樣。喂，你估街市買菜呀？出三號波就要有埋八號至收貨呀？大佬，人地都要睇埋本地風力係咪真係達到要求，至決定係咪出相應既警告信號架嘛，唔係整個系統出黎做乜呀？你估當古懂放博物館任睇咩！

講開又講，天文台出波，會根據甚麼準則呢，大家可以瀏覽網頁就睇到。http://www.weather.gov.hk/informtc/tcsignal3_ref_uc.htm
香港地勢山多平地少，不同地區既風力差異可以好大。你站在高地上，感受既風力隨時吹番你落山，但係企大馬路既朋友又會話風都唔多滴，出甚麼波呀？所以天文台揀選呢 8 個站，其實係儘量平衡風力差異這個問題。

至於話，明明琴晚會轉乜波，點解到今日仲未轉，好取決於個風打算點樣行，幾時可以去到預定目的地，等你吹到強風 / 烈風。。。仲有好多氣象因素，例如環境風場，覆蓋香港既，係乜野級數既風，都好影響天文台決定發出既信號。所以，今次天文台不斷修正，其實係配合泰利既性格，未諗通自己想點行，當然係按兵不動最穩陣啦。

Chung Cordero