2010年10月15日，星期五

繼續趕鴨仔的一天。六點半叫床，繼續炒麵早餐。跟住去左個上海建設什麼館。睇完又係唔太知睇左乜......因為都係「趕鴨仔」，跟住又上車去間劇院聽講座，講「世博與上海復興之路」之類既野。結果大部分人係去左訓覺，小弟都頂唔住，中下中下。。。

之後去食午餐。「雞咁腳」咁食。然後就過去「上海站」轉高鐵。去到車站，只係見到一大堆人......等過安檢。因為好多人等入去，結果後來佢地開多條通道比百幾條友一齊過。上到候車室，仲搞笑，檢票間旁邊係坐位......排隊入閘點排呀?? 即係響港鐵站閘機旁整行座椅比人坐...阻住地球轉呀。

上到車，車廂設計唔錯。同地鐵線差不多，坐位排向同以前火車咁----向前排好。上車時，一貫中國特色：一擁而上，同埋唔食唔得既煙，仲要鬼咁大味！

去到南京，起初以為凍到死，但係原來有成 26 度......熱死。跟住去見領導，又聽一輪廢話，開餐睇表演，同呀媽夜校聚餐一樣，係啵，同一屋簷下嘛！

同當地青年交談，勉強都係青年既，40樓下嘛！傾過好多野，由交通到文明，皆因對家係響大學裡頭工作，呢類議題開正佢範。對於八零後新生代，佢認為，年青一代要比佢地較多空間自由發揮，同好多學者生法一致。