近況

近期，市場禾雀亂飛，好多消息...希臘會違約、歐豬唔掂、通街都炒緊人、舖頭十室九空......

自己都有亂亂地。因為自己都搵緊工，見到出面都有企業招聘人手，但係覺佢地既態度都轉趨審慎。

祖國廣東佛山最大既塑膠廠都倒閉......內地全民放數，但係有人走佬，結果個耳窿要收細，因為放左廿億出去，原來可以有一半係收唔番。。。而全國銀行錄得資金淨流出既水平亦見攀升，足見內地好多企業都開始不務正業，走左去做收數佬。
無他，因為放數好搵過做老本行，回報可以有成二百厘息，我有錢...都做放數好過打工啦，係咪先...

但係，青青講得到位，個市開始崩潰緊，只係大家被溫水煮緊，唔多覺而已。今日，最好就係一班手持現金而唔入市既隱然人士，因為真係唔使咁急去買野，個市都只係彈散格。跌得多，跌到殘，咪整幾個利好因素比佢，等佢升番一浸。班芬佬就係咁派貨，班傻仔就係咁接貨。其實經歷過2007，班傻仔好似仲未有領會到咁，呢個時候仲好恨要有貨響手，無貨會訓唔到咁。

「陰毒精伯南克」<<<(青姐咁講既)，無論佢出幾多招降龍十八掌都係無用架......因為，美國人民係唔敢消費，唔係個息高唔買樓，而係根本無工開，好似我一個表姐既呀爸...響美國住緊，佢美國公司要佢放三星期無薪假......係香港班零項全能官員仲同大家講，OT 係正野，掂架。。。

講開又講，乜野叫做OT呢???